Қошанов: Қазақстандық қамту үлесі үнемі депутаттардың бақылауында

10 қазан, Ақтау. Мәжіліс төрағасы Ерлан Қошанов Ақтау қаласында өткен Мұнай-газ машина жасау форумы барысында сөз сөйледі. Форумды Энергетика министрлігі Парламент Мәжілісімен бірлесіп ұйымдастырған. Іс-шараға мемлекеттік органдар, бизнес өкілдері, «ҚазМұнайГаз» ұлттық компаниясы, даму институттары мен отандық және шетелдік мұнай-газ машина жасау кәсіпорындарының басшылары қатысты.

Форумның ашылуында Ерлан Қошанов тәуелсіздік жылдары Қазақстанның жаһандық мұнай нарығындағы жетекші елдердің біріне айналғанын атап өтті. Оның айтуынша, шетелдік компаниялармен бірлескен ірі жобалар арқасында елімізде мыңдаған инженер мен техниктер даярланып, заманауи технологиялар игерілген.

«Енді алдымызда тұрған мақсат – Қазақстанды индустриялық қуатты мемлекетке айналдыру. Бұл бағыт Мемлекет басшысының ерекше назарында. Парламент заңнамалық тұрғыда қолдауды жалғастыра береді. Үкімет жұмысты тиімді ұйымдастырып, бизнес өнім сапасын халықаралық стандартқа сай етсе, жаңа жұмыс орындары ашылып, елдің экономикалық дербестігі нығаяды», – деді Мәжіліс төрағасы.

Энергетика министрлігінің дерегінше, форум аясында 440 миллион АҚШ доллары көлемінде келісімшарт жасалмақ. Өткен жылы энергетика секторының өзінде жер қойнауын пайдаланушылардың сатып алу көлемі 6 триллион теңгеден асқан. Оның 62 пайызы Теңізшевройл, KPO және NCOC компанияларына тиесілі.

«Соңғы екі жылда үш ірі компаниямен шамамен 900 миллион доллардың келісімшарты жасалды. Тендерлік рәсімдер жеңілдетіліп, ұзақ мерзімді келісімдерге басымдық берілді. Дегенмен әлеует әлі де жоғары, сондықтан жұмысты жалғастыру қажет», – деді Қошанов.

Мәжіліс спикері мұнай-газ машина жасау саласын дамыту үшін үш негізгі бағытты атады:
– отандық өндірушілерге сатып алу рәсімдерін жеңілдету және ұзақ мерзімді келісімшарттар жасау;
– кәсіпорындарды күрделі жабдықтар шығаруға ынталандыру;
– мұнай компанияларының қазақстандық тауарлар мен қызметтерді көбірек тұтынуы.

Сонымен қатар Ерлан Қошанов «Жер қойнауы және жер қойнауын пайдалану туралы» кодекске енгізілген жаңа түзетулерге тоқталып, енді ірі операторлар отандық мамандарға басымдық беруге міндетті екенін атап өтті. Сондай-ақ күрделі жобаларда елішілік құндылық үлесі бекітіліп, офтейк-келісімшарттарда отандық үлестің ең төменгі деңгейі заңмен күшейтілді.

Форум барысында Маңғыстау облысының әкімі Нұрдәулет Қилыбай, Энергетика вице-министрі Құдайберген Арымбек, «ҚазМұнайГаз» төрағасы Асхат Хасенов, сондай-ақ ірі халықаралық операторлар – Норд Каспиан Оперейтинг және Қарашығанақ Петролиум Оперейтинг Б.В. компанияларының басшылары сөз сөйледі.

Шара аясында қазақстандық өндірушілер көрмесі ұйымдастырылды. Онда 45 компания металл құрылымдар, сорғылар, құбырлар мен химиялық жабдықтарын ұсынды.

Мәжіліс депутаттары өңірге сапары барысында Маңғыстау атом энергетикалық комбинатына, «ҚазАзот» кәсіпорнына, сондай-ақ Жаңаөзендегі «Каскор-Машзавод» зауытының құрылысына барып, өндіріс барысымен танысты.