«Қос қолдап қолдаймыз»: вице-министр алкогольге шектеу қажет екенін айтты

Қазақстанда алкоголь өнімдерінің айналымын қатаңдату ұсынысына Ішкі істер министрлігі қолдау білдірді. Бұл туралы ҚР ішкі істер вице-министрі Игорь Лепеха мәлімдеді.

Оның айтуынша, алкогольге қатысты шектеулерді күшейту – өзекті мәселе.

«Ішкі істер министрлігі бұл бастаманы қос қолдап қолдайды. Қазіргі таңда қылмыстардың едәуір бөлігі мас күйде, ішімдік ішу салдарынан жасалып отыр. Тұрмыстық кісі өлтіру қылмыстарының басым көпшілігі де осы себепке байланысты», – деді вице-министр.

Қазақстан Республикасының Ішкі істер министрлігі бұған дейін алкогольдің түнгі уақытта сатылуына тыйым салу, оны тек арнайы дүкендерде сату, сондай-ақ ойын-сауық орындарында спирттік ішімдікті өткізу уақытын шектеу жөнінде бірнеше рет ұсыныс жолдаған.

Алайда бұл бастамалар әзірге тек ұсыныс деңгейінде қалып отыр.

«Мұндай кез келген бастаманы біз қолдаймыз. Ал нақты норма қабылдана ма, жоқ па – ол Қазақстан Республикасы Мәжілісінің құзырындағы мәселе. Қай уақытта және қандай форматта қабылданатыны депутаттардың жұмысына байланысты», – деп түйіндеді Игорь Лепеха.