Қорғаныс министрлігі әскери қызметшілердің қазасына байланысты мәлімдеме жасады

Қазақстан Қорғаныс министрлігі жыл басынан бері бірнеше әскери қызметшінің қаза табуына байланысты ресми мәлімдеме таратты. Ведомствоның хабарлауынша, Қарулы күштер қолбасшылығы орын алған оқиғалардың салмағын және әскери қызмет қауіпсіздігін қамтамасыз етуге жүктелген жауапкершілікті толық түсінеді.

Осыған байланысты Қорғаныс министрі Даурен Қосановтың тапсырмасымен мұндай қайғылы жағдайлардың алдын алуға бағытталған шұғыл шаралар кешені қабылданған.

Қазақстан Республикасының Қорғаныс министрлігі әскери бөлімдерде тәрбие жұмысының ұйымдастырылуына және әскери тәртіптің жай-күйіне бақылау күшейтілгенін мәлімдеді. Қару қолдану, оқу-жаттығу сабақтарын өткізу, атыс пен қызметтік міндеттерді орындау кезінде қауіпсіздік талаптары мен жарғылық нормаларды сақтау қатаңдатылған.

Сонымен қатар Қарулы күштердің барлық әскери бөлімдеріне жеке құрамды кешенді психологиялық тексеруден өткізу үшін арнайы комиссиялар жіберілген. Әрбір әскери қызметшінің психикалық жағдайына, қызметтік міндеттерді орындауға психологиялық дайындығына қайта бағалау жүргізіліп жатыр.

«Әскери полиция күштерімен әскери бөлімдерде жан-жақты тексерулер ұйымдастырылды. Жеке құрамға, оның ішінде қызметтен тыс уақытта да бақылау күшейтілді», – деп хабарлады министрлікте.

Сондай-ақ командирлер мен сержанттық құрамның жеке жауапкершілігі арттырылған. Негізгі басымдық оқиғалардың алдын алуға, қауіпсіз мінез-құлық дағдыларын қалыптастыруға беріліп отыр. Бұған қоса тәулік бойғы бақылау енгізіліп, әскери қызметшілердің туыстарымен тұрақты бейнебайланысы жолға қойылған. Бөлімше командирлері ата-аналармен ресми байланыс арналары арқылы жүйелі түрде хабарласып отырады.

Министрліктің мәліметінше, әрбір оқиға бойынша нақты кадрлық және тәртіптік шешімдер қабылданған. Атап айтқанда, «Шығыс» өңірлік қолбасшылығының қолбасшысы, штаб бастығы, тәрбие және идеологиялық жұмыс жөніндегі орынбасары тәртіптік жауапкершілікке тартылған. Қаза болған әскери қызметші тіркелген әскери бөлімнің командирі, оның орынбасары және батальон командирі атқарып отырған қызметтерінен босатылған.

Еске салайық, 13 қаңтарда Алматы облысындағы полигонда өткен оқу атысы кезінде қауіпсіздік талаптарының бұзылуы салдарынан 5571 әскери бөлімінің әскери қызметшісі АК-74 автоматынан оқ тиіп, аяғынан жараланған. Ол Қонаев қалалық ауруханасына жеткізілген болатын.

23 қаңтарда Өскемен гарнизонындағы әскери бөлімдердің бірінде қарауыл қызметін атқару кезінде мерзімді әскери қызметші өзіне оқ атып, алған жарақатынан көз жұмды.

Ал 27 қаңтарда Жамбыл облысында мерзімді әскери қызметші қарумен жұмыс істеу кезінде алған жарақат салдарынан қаза тапқаны хабарланған.