Қорғаныс министрі Жамбыл облысының әскери бөлімшесін тексерді

Қорғаныс министрі, авиация генерал-лейтенанты Дәурен Қосанов ешқандай алдын ала ескертусіз «Оңтүстік» өңірлік қолбасшылығына қарасты 03811 әскери бөліміне барып, кешенді тексеріс өткізді.

Министр бөлімдегі қызметтің ұйымдастырылуын, жарғылық тәртіптің сақталуын, жауынгерлік дайындық деңгейін және әскери инфрақұрылымның жай-күйін бақылады. Сондай-ақ казармалар мен санитарлық аймақтарды аралап, тамақтану сапасын, сарбаздардың тұрмыс жағдайын және моральдық-психологиялық ахуалын тексерді.

Сапар барысында Қорғаныс министрі бөлімдегі ерекше сәтке – 60 жас сарбаздың әскери ант қабылдау рәсіміне қатысты. Ол жаңа жауынгерлерді құттықтап, Отанға адал қызмет етуге, әскери тәртіп пен тәрбиеге берік болуға шақырды.

«Ант қабылдау – әрбір қазақстандық үшін қасиетті сәт. Бұл елге деген адалдықтың, ерлік пен намыстың символы», – деді министр Дәурен Қосанов.

Салтанатты шараға сарбаздардың ата-аналары еліміздің түрлі өңірлерінен келіп қатысты. Олар үшін Ашық есік күні ұйымдастырылып, бөлімнің тұрмыс жағдайы, оқу-жаттығу базасы және жас әскери қызметшілерге арналған әлеуметтік бағдарламалар таныстырылды.

Кейін министр сарбаздармен және олардың ата-аналарымен бейресми әңгіме өткізіп, әскери қызметтің маңызы мен жастардың армиядағы рөлі туралы ой бөлісті.

Қазіргі таңда 03811 әскери бөлімі «Оңтүстік» өңірлік қолбасшылығындағы үздік бөлімдердің бірі саналады. Ол жауынгерлік дәстүрлер мен әскери ерлікті лайықты жалғастырып келеді.

Сапар соңында Қорғаныс министрі бөлім басшылығына әскери тәртіпті нығайту, қызмет қауіпсіздігін қамтамасыз ету және жауынгерлік дайындықты жетілдіру бойынша нақты тапсырмалар берді.