Қорғаныс министрі бокстан екі дүркін әлем чемпионын медальмен марапаттады

Қорғаныс министрлігінде армия спортшысы, бокстан екі дүркін әлем чемпионы қатардағы жауынгер Алуа Балқыбекованың жеңісіне арналған салтанатты жиын ұйымдастырылды. Спортшы Ливерпульде өткен әлем чемпионатында алтын медаль иеленген болатын.

Қорғаныс министрі, авиация генерал-лейтенанты Дәурен Қосанов чемпионды жеңісімен құттықтап, оның табандылығы мен ерлігін атап өтті. Министрдің айтуынша, Балқыбекованың жетістігі жастарға үлгі болып, сенім мен жігердің маңызын айқын көрсетті.

Сондай-ақ министр Армия орталық спорт клубы бокс командасының басшысы, аға лейтенант Әлішер Омаркұловқа чемпионды дайындаудағы еңбегі үшін алғыс білдірді.

Елеулі жетістіктері үшін Алуа Балқыбекова «Ел қорғаны» ведомстволық медалімен марапатталды. Ал Әлішер Омаркұловқа мерзімінен бұрын «капитан» әскери атағы берілді.

Өз кезегінде чемпион қолдау көрсеткені үшін ризашылығын білдіріп, Қорғаныс министрлігіне әйелдер құрамасының әлем чемпиондары қол қойған бокс қолғаптарын сыйға тартты.

«Мен армия спортының бір бөлігі болғаныма мақтанамын. Әріптестеріме, жаттықтырушыма және Қорғаныс министрлігіне қолдауы үшін алғыс айтамын. Жеңістерім жастарды спортқа баулиды деп сенемін», – деді Балқыбекова.

Іс-шара соңында спортшылар мен жаттықтырушыларға алғыс хаттар мен естелік сыйлықтар табысталды. Жиын армия спортын дамыту – жоғары жетістіктерге жететін мамандарды даярлаудың маңызды бөлігі екенін айқындады.