Көліктің алдыңғы әйнегін қараңғылауға рұқсат берілуі мүмкін

Ішкі істер министрлігі көліктің алдыңғы әйнегі мен алдыңғы терезелерін қараңғылауға рұқсат беру мүмкіндігін қарастырып жатыр.

«Мен көлік саласының маманы емеспін. Терезені қараңғылау мәселесі баяғыдан көтеріліп келеді, қазір ІІМ алдыңғы терезелерді қараңғылауға тыйым салу тарихын зерттеп жатыр. Бұл мәселелерді депутаттар да көтеріп жүр. Сіздерге айтарым, Кеден одағының регламенті бар, онда алдыңғы терезелердің қаншалықты қараңғылануы керектігі көрсетілген. Бұл тыйым жол қауіпсіздігі ережесін бұзған жүргізушілер мен жолаушыларды тануға кедергі келтіргені үшін енгізілді. Қазір бұзушылықтарды тіркеудің жаңа техникалық құралдары пайда болды, сондықтан біз оның қаншалықты мүмкін екенін немесе зиян болатынын зерттеп жатырмыз», – деді вице-министр Марат Қожаев сенат кулуарында.

eOtinish сайтында көліктің алдыңғы әйнегіне тонировка жапсыруға рұқсат беру туралы петиция жарияланып, қазірге дейін 3500-ге жуық қол жинаған. Елімізде алдыңғы әйнекті қараңғылауға 2010 жылы тыйым салынған. 

Қазақстанда алдыңғы терезелерге, соның ішінде мөлдір атермальды пленкаларға түсті пленкаларды жапсырғаны үшін жүргізушілерге 5 АЕК (18 460 теңге) айыппұл салынады.

Қазіргі уақытта көліктерді ақылы негізде қараңғылауға Өзбекстанда 2018 жылдан бастап және Қырғызстанда 2022 жылдан бастап рұқсат етілген.