Көлік арзандап, сұраныс күрт артты: Қазақстандықтар қай моделдерді көп таңдап жатыр

Қазақстанның автокөлік нарығында үлкен серпіліс байқалуда. Қазақстан автокөлік одағының (ҚАО) мәліметінше, сәуір айында елімізде 20 857 жаңа жеңіл және коммерциялық техника сатылған. Бұл өткен жылдың сәйкес кезеңімен салыстырғанда 8,4 пайызға көп және биылғы жыл басталғалы ең белсенді айлардың бірі ретінде тіркелді. Нарықтағы бағаның біртіндеп төмендеуі сатып алушылардың белсенділігін тіпті оятып жіберді.

ҚАО президенті Анар Макашеваның айтуынша, қазір нарықта ресми дилерлер арасындағы бәсеке өте қатты жүріп жатыр. Дилерлер модельдік қатарды жиі жаңартып, тиімді ұсыныстар жасауда, соның әсерінен орташа чек біртіндеп төмендеп келеді.

Сатып алушылар жаңа брендтер мен заманауи технологияларға үлкен қызығушылық танытуда. Әсіресе, Отандық өндіріс көліктері мен баламалы қуат көзімен (гибридті және электромобильдер) жүретін машиналардың үлесі айтарлықтай өсіп жатыр.

Сәуір айында Chevrolet маркасы бәрінен озып шықты. Дилерлер бұл брендтің 5501 көлігін сатып, сауданы өткен жылмен салыстырғанда бірден 101,9 пайызға арттырды. Екінші орында Hyundai (2656 көлік), үшінші орында Kia (1912 көлік) тұр.

Алайда, нарықта ең алып серпіліс жасаған қытайлық Changan бренді болды. Оның сатылымы 172,4 пайызға өсіп, 1882 көлікке жетті. Сондай-ақ, қарқынды өсіп келе жатқан брендтер қатарында BYD (өсімі 209,6 пайыз) және MG (өсімі 282,4 пайыз) маркалары ерекшеленді.

Еліміздегі ең танымал модель ретінде тағы да Chevrolet Cobalt көш бастады (5319 дана). Екінші және үшінші орындарды сәйкесінше Hyundai Tucson және Hyundai Mufasa үлгілері иеленді.

Сәуір айындағы үлкен серпіліске қарамастан, биылғы жылдың алғашқы төрт айының жалпы қорытындысы өткен жылдың деңгейінен сәл де болса артта қалып қойды. Қаңтар-сәуір айларында елімізде 65 610 автокөлік сатылса, өткен жылы бұл көрсеткіш 66 101 болған (төмендеу — 0,7 пайыз). Төрт айдың қорытындысы бойынша да Chevrolet бренді 12 130 көлікпен бірінші орында тұр.