Қоқысты көрінген жерге төгетіндердің көлігі тәркіленеді

Қазақстанда рұқсатсыз жерге қоқыс төгетіндерге қатысты жазалар күшейтілуде. Экология және табиғи ресурстар министрлігі қалдықтарды бейберекет төккендерге қатаң шаралар қолдануды қолға алды. Енді қоқысты арнайы белгіленбеген жерге төккендер үшін көліктері мен басқа да мүліктері тәркіленуі мүмкін. Бұл заң бұзушылықтармен күрес аясында "ҚР Әкімшілік құқық бұзушылық туралы кодексіне" өзгерістер енгізу туралы заң жобасы әзірленді. 

Премьер-министр Олжас Бектеновтің айтуынша, қазіргі таңда қоқысты жинап, тасымалдау және өңдеу бойынша бірқатар жеңілдетілген жобалар қарастырылуда. Мысалы, қалдықтарды қайта өңдейтін зауыттар салуға арзан несие беру арқылы кәсіпкерлерді қолдау шаралары жүргізілуде. Алайда, заңсыз әрекет еткендерге жаза күшейтіліп, қоқыс тастау үшін пайдаланылған көлік құралдары тәркіленеді. Бұл шара рұқсат етілмеген полигондар санын азайту және экологиялық жағдайды жақсарту мақсатында енгізілмек.

Жалпы, экологияны қорғау мақсатында құқық бұзушылықтармен күрес күшейтіліп, әкімшілік айыппұлдар көлемі де артып келеді. 2024 жылдың алғашқы сегіз айында құқық қорғау органдары абаттандыру қағидаларын бұзған 300 мыңға жуық хаттама толтырды.