Көктемгі су тасқыны кезінде жарылған бөгеттің басқарушысына үкім шықты

Хромтауда сот Мағажан су қоймасындағы бөгеттің жарылуына кінәлі деп танылған 75 жастағы кәсіпкерге үкім шығарды. Ол өз міндеттеріне немқұрайлы қарағаны үшін екі жыл алты айға бас бостандығын шектеу жазасына кесілді, деп хабарлады «Диапазон».

Сот үкімінде көрсетілгендей, кәсіпкер су деңгейінің қауіпті деңгейге жеткенін білген, алайда суды дер кезінде ағызып жіберу шараларын қабылдамаған. Сонымен қатар ол өсірілген балықтарды сақтап қалу мақсатында тек бір ғана шлюзді ашып, бұл судың бақылаусыз жиналуына және бөгеттің жарылуына әкелді.

Салдарынан Табантал, Қызылту және Бесқопа ауылдары су астында қалып, 215 адам эвакуацияланды, электр желілері зақымданып, бөгетті қайта қалпына келтіруге 200 млн теңге қажет болды.

Сотталған азамат кінәсін мойындамады және барлық техникалық қызмет көрсету жұмыстарын уақтылы жүргізгенін, сондай-ақ билік өкілдерін жөндеу қажеттілігі туралы хабардар еткенін айтты.

Сот шешімі бойынша ол су тасқынынан зардап шеккен ауыл тұрғындарына және «Энергосистема» ЖШС-не келтірілген материалдық шығынды өтеуге міндеттелді. Алайда әкімдіктің авариялық-қалпына келтіру жұмыстарына кеткен шығынды өтеу туралы талабы азаматтық сотта қаралатын болады.

Жергілікті тұрғындардың айтуынша, су тасқыны олардың құрылыс материалдарын, мал азығын жойып, құстарын қырып кетті. «Энергосистема» ЖШС өкілі су астында қалған электр желілерінің тіректері зақымданып, жөндеу жұмыстарына 2 млн теңгеден астам қаражат жұмсалғанын мәлімдеді.

Сот үкімі әлі заңды күшіне енген жоқ.