Көкшетауда әйелді қағып өлтірген жүргізушінің куәлігі болмаған

Ақмола облысының полиция департаменті Көкшетауда жалғызбасты ананы қағып өлтірген әйелдің жүргізуші куәлігі болмағанын хабарлады. Сондай-ақ оның көлік жүргізу бойынша оқудан өтпегені анықталған.

Полиция мәліметінше, 52 жастағы әйелдің өліміне байланысты екі қылмыстық іс қозғалған. Көлікті басқарған әйелге жол қозғалысы ережесін бұзып, абайсызда адам өліміне әкелді деген күдікпен тергеу жүргізіліп жатыр.

Тергеу барысында күдіктінің көлік жүргізу құқығы болмағаны белгілі болған. Осыған байланысты көлік иесі саналатын оның жұбайына да жүргізу құқығы жоқ адамға көлік басқаруға рұқсат берді деген бап бойынша қылмыстық іс қозғалды.

11 мамырда Көкшетау қаласының мамандандырылған тергеу соты күдікті әйелді үйқамаққа алу туралы шешім шығарды. Қазір іс бойынша тергеу амалдары жалғасып жатыр.

Бұған дейін әлеуметтік желіде жол апатының видеосы тараған болатын. Кадрларда жол талғамайтын көлік бұрылыста әйелді қағып, басып кеткені көрінеді.