Көкпарда қаза тапқан жасөспірімнің ісі тоқтатылды: туыстары шешіммен келіспейді

Ақмола облысында көкпар кезінде жасөспірімнің қаза болуына байланысты қозғалған қылмыстық іс тоқтатылды. Полиция қылмыстық құқық бұзушылық құрамы жоқ деген қорытындыға келген. Алайда марқұмның туыстары бұл шешіммен келіспейді, деп жазды HALYQSTAN Telegram арнасы.

Қайғылы оқиға 26 мамырда Целиноград ауданында болған. Жергілікті тұрғындар көкпар ұйымдастырғанымен, бұл туралы жергілікті билікке хабарламаған. Ойын өтіп жатқан кезде Дінмұхаммет есімді жасөспірім ауыр жарақат алып, кейін ауруханада көз жұмған.

Ақмола облысы полиция департаментінің мәліметінше, іс бойынша қажетті тергеу амалдары толық жүргізілген.

«29 шілдеде қылмыстық құқық бұзушылық құрамының болмауына байланысты қылмыстық іс тоқтатылды. Шешімді аудан прокуратурасы бекітті», – деп хабарлады полиция.

Алайда Дінмұхамметтің туыстары баланың өлімін жай ғана жазатайым оқиға деп тануға қарсы. Олардың айтуынша, көкпар кезінде қарсылас команданың ойыншысы қатты жылдамдықпен келіп, Дінмұхаммет мінген атқа бүйірден соғылған. Осыдан кейін жасөспірім жерге құлаған.

Марқұмның туыстары сот-медициналық сараптама қорытындысына да назар аударып отыр. Олардың сөзінше, құжатта денсаулыққа ауыр зиян «қатты доғал заттардың әсерінен» келгені жазылғанымен, жарақаттың аттан құлау салдарынан болғаны көрсетілмеген.

«Баланың басы жарақаттанған, жұлыны үзілген, мойны сынған. Аттан құлағанда осындай жарақат алуға бола ма? Біз құлау туралы нұсқаға сенбейміз. Сұрағымыз өте көп, бірақ ешкім жауап бермейді», – деді марқұмның туысы.

Отбасы баланың өміріне үйлеспейтін жарақатты ат үстінде, қарсылас ойыншы соқтығысқан кезде алған болуы мүмкін деп есептейді. Сондай-ақ олар тергеу кезінде соқтығыстың мән-жайы толық зерттелмеді деген пікірде.

Жасөспірім қаза болғаннан кейін Спорт және дене шынықтыру істері комитеті Бұқаралық көкпар федерациясының аккредиттеу куәлігін бір айға тоқтатқан. Ақмола облысының дене шынықтыру және спорт басқармасына өңірдегі бұқаралық көкпардың өткізілуін қатаң бақылау тапсырылған.