Көк аспанды серік етіп, әуе кемесін сенімді тізгіндеген қазақ қызы

Авиация саласындағы «темірдей» тәртіп пен қатаң талаптарға қарамастан, қазақ қыздары көк жүзінде еркін қалықтап жүр. Солардың бірі - «Air Astana» әуе компаниясының екінші ұшқышы Дана Қылышбаева.

Бүгінде халықаралық рейстерді сәтті орындап жүрген Дананың авиацияға деген махаббаты бала кезден басталған. Оның жұлдыздар мен ғарышқа деген қызығушылығы уақыт өте келе нақты мақсатқа айналып, үлкен арманға жол ашты.

Дана Қостанайдағы Назарбаев зияткерлік мектебінің түлегі. Ата-анасының қолдауы мен мектепте алған терең білімі оған Мажарстан үкіметінің Stipendium Hungaricum грантын иеленуге мүмкіндік берген. Дебрецен университетінде «Кәсіби ұшқыш» мамандығы бойынша білім алған ол, оқу барысындағы қиындықтарға қарамастан, өз ісінің нағыз маманы болып шықты.

«Авиация - қателікті кешірмейтін сала. Оқуға түскен кадеттердің 40%-ға жуығы қиындыққа шыдамай, жол ортадан қайтып жатады. Әлемдік статистика бойынша әйел ұшқыштардың үлесі небәрі 5%-ды құрайды, ал елімізде 34 қана ару осы салада еңбек етеді», - дейді Дана Қылышбаева.

Кейіпкеріміз алғаш рет 2021 жылы Cessna-172 ұшағының тізгініне отырған. Бүгінде ол алып әуе кемелерімен Жидда (Сауд Арабиясы) секілді халықаралық бағыттарға жолаушылар тасымалдайды. Ұшқыш қыздың айтуынша, жұмысқа қабылдау кезінде тек білім ғана емес, сонымен қатар:

• Стресске төзімділік;
• Психомоторлық қабілеттер;
• Шұғыл шешім қабылдау жылдамдығы;
• Мінсіз денсаулық жағдайы қатаң тексеріледі.

Қазіргі таңда Дана еліміздің бас әуе тасымалдаушысы саналатын компанияда жұмыс істеп жатқанына бір жылдан асқан. Ол алдағы уақытта тәжірибесін шыңдап, бұдан да күрделі бағыттарды меңгеруді жоспарлап отыр.
Өз арманына адал ару замандастарына үндеу тастап: «Арманыңыздан қорықпаңыздар. Көк аспандай шексіз әрі ашық мүмкіндіктерге ұмтылыңыздар», - деген тілегін білдірді.