ҚМДБ квадроберлерге қатысты үкім шығарды

Қазақстан мұсылмандары діни басқармасының Ғұламалар кеңесі соңғы уақытта танымал болып жатқан квадроберлерге қатысты үкім шығарды.

Мәлімдемеде квадроберлердің жануарлардың бейнесіне еліктеп, олардың іс-қимылдарын қайталауы ислам дінінің қағидаларына қайшы екені айтылған.

«Құранда: "Біз Адам балаларын ардақты етіп, құрлықта да, теңізде де (емін-еркін) жүргіздік. Һәм таза (адал) азықтарды ризық етіп бердік. Сондай-ақ оларды жаратқан нәрселеріміздің көбінен әлдеқайда үстем еттік", – делінген. Демек, бұл аяттардан түсінетініміз, адам баласының жануарға еліктеп, сол дәрежеге түсуі, төрт аяқтап жүруі, өзін ардақтау емес, қорлау болып саналады», – делінген ҚМДБ мәлімдемесінде.

Ғұламалар кеңесі тіпті адам баласының жануарға еліктеуі түгілі, әйел адамның ер адамға, ер адамның әйел адамға еліктеуіне де шариғатта тыйым салынғанын атап өтті. Жануарлардың әдеттеріне (мысалы, ит сияқты үру, есек сияқты ақыру) әдейі еліктеу, олардың тамағын жеу немесе іс-қимылдарын қайталау ислам дінінде Алланың жаратқан табиғатын өзгерту деп танылады.

Ал батырды арыстанға, айлакерді түлкіге теңеу, театрлық қойылымдар мен балаларға арналған ойындар мұндай еліктеуге жатпайды.

Шешім:
Квадроберлікке, яғни жануарлардың деңгейіне түсіп, оларға еліктеп дауыс шығаруға, іс-қимылдарын жасауға шариғат бойынша қатаң тыйым салынады.