ҚҚК Қазақстан мұнайын қайта қабылдай бастады

Каспий құбыр консорциумы дрон шабуылдарынан кейін уақытша тоқтаған мұнай қабылдау және жөнелту жұмыстарын қайта бастады. Бұл туралы энергетика министрінің кеңесшісі Әсел Серікпаева мәлімдеді.

Оның айтуынша, қазір Новороссийск портындағы теңіз терминалында мұнай танкерлерге қайта тиеліп жатыр. ҚҚК-ның екі айлақ құрылғысында SEAMAJESTY және MILOS танкерлеріне «Теңізшевройл» мұнайы құйылуда.

«Каспий құбыр консорциумы жүк жөнелтушілерден мұнай қабылдауды және Новороссийск портындағы теңіз терминалы арқылы жөнелтуді қайта бастады», – деді Серікпаева.

Энергетика министрлігі мұнай қабылдаудың қайта жандануы өндіруші компанияларға шикізатты құбыр жүйесіне беруді жалғастырып, теңіз терминалы арқылы экспортты қалпына келтіруге мүмкіндік беретінін мәлімдеді.

Бұған дейін дрон шабуылдарынан кейін ҚҚК арқылы мұнай жөнелту уақытша тоқтаған еді. Соның салдарынан мұнай өндіруші компаниялар қоймалар толып кетпеуі үшін тәуліктік өндіріс көлемін азайтқан.

ҚҚК арқылы Қазақстан мұнай экспортының шамамен 80%-ы тасымалданады. Министрлік терминалдағы алдағы жұмыстар қазіргі жағдай мен қауіпсіздік талаптарына қарай жүргізілетінін хабарлады.