КҚК-ға жасалған шабуылдардан Қазақстан 3,5 млн тонна мұнай өндіре алмады

Каспий құбыр консорциумына жасалған шабуылдар салдарынан Қазақстан биыл шамамен 3,5 млн тонна мұнай өндіре алмады. Бұл туралы Энергетика министрі Ерлан Ақкенженов Үкіметтегі баспасөз мәслихатында мәлімдеді.

Министрдің айтуынша, бастапқыда 2026 жылы 99 млн 550 мың тонна мұнай өндіру жоспарланған. Алайда қаңтардағы және маусым-шілде айларындағы шабуылдар өндіріс көлеміне әсер еткен.

«Біз 98 млн тонна өндіруді жоспарлаған едік, қазір түзетілген жоспар – 96 млн тонна», – деді Ақкенженов.

Осы жағдайға байланысты «Теңізшевройл» акционерлері күрделі жөндеу жұмыстарын 2027 жылға ауыстыру туралы шешім қабылдаған.

Энергетика министрлігі де NCOC басқаратын кен орындарындағы жөндеу жұмыстарын келесі жылы өткізуді жоспарлап отыр.