КҚК-ға шабуылдардан кейін Қазақстан мен ЕО мұнай тасымалын талқылады

Қазақстанның сыртқы істер министрі Ермек Көшербаев Еуропалық одақтың сыртқы істер және қауіпсіздік саясаты жөніндегі жоғары өкілі Кая Калласпен Каспий құбыр консорциумы (КҚК) арқылы мұнай тасымалдау инфрақұрылымын одан әрі дамыту мүмкіндіктерін талқылады. Бұл туралы Қазақстанның Сыртқы істер министрлігі хабарлады.

Телефон арқылы сөйлескен тараптар энергия ресурстарын жеткізудің халықаралық инфрақұрылымына қатысты мәселелерді қарастырған. Соның ішінде КҚК аясындағы инфрақұрылымды одан әрі дамыту мүмкіндіктері сөз болған.

Көшербаев пен Калластың әңгімесі Украина Ресейдің Новороссийск портындағы КҚК нысандары мен мұнай танкерлеріне шабуыл жасап, Қазақстан мұнайының экспортына кедергі келген тұста өтті. Қазақстан батыс өңірлерінде өндірілетін мұнайдың басым бөлігін КҚК арқылы әлемдік нарыққа шығарады.

Шілденің ортасында Украина дрондары Новороссийск портына, КҚК инфрақұрылымына және мұнай танкерлеріне шабуыл жасаған. Осыдан кейін консорциум Қазақстан мұнайын қабылдауды уақытша шектеп, кейін қайта қалпына келтірді.

Шабуылдарға байланысты Қазақстан мұнайының бір бөлігі балама бағыттарға жіберілген. Энергетика министрлігінің мәліметінше, мұнай Ақтау порты, Атасу – Алашанькоу және Атырау – Самара бағыттарына қайта бөлінген. Қазақстан сондай-ақ Баку – Тбилиси – Жейхан және Баку – Супса бағыттарын қосымша мүмкіндік ретінде қарастырып жатыр.

Тамыздың басында Ермек Көшербаев АҚШ мемлекеттік хатшысы Марко Рубиомен телефон арқылы сөйлесіп, КҚК инфрақұрылымына жасалған шабуылдарды талқылаған еді. Кейін америкалық ақпарат құралдары дереккөздеріне сүйеніп, АҚШ-тың өтінішінен кейін Украина Новороссийск портында Қазақстан мұнайын тасымалдайтын танкерлерге шабуыл жасамауға келіскенін хабарлады.