Килиан Мбаппе Франция құрамасының тактикасын сынға алды

Футболдан 2026 жылғы әлем чемпионатының жартылай финалында Испаниядан 0:2 есебімен ұтылған Франция құрамасының капитаны Килиан Мбаппе команданың ойын жоспарына көңілі толмайтынын ашық білдірді.

Француз шабуылшысының айтуынша, команданың негізгі қателігі орталық алаңдағы бақылауды қарсыласқа беріп қоюында болды. Мбаппе Испанияның негізгі ойыншылары Фабиан Руис пен Родриге тым көп еркіндік берілгенін және прессинг кезінде коммуникацияның жетіспегенін атап өтті.

«Біз жартылай қорғаныста үнемі сан жағынан ұтылдық. Испания сияқты командаға қарсы ойнағанда бұл үлкен қателік. Бастапқы жоспар бойынша жоғары прессинг жасап, қарсыластың ырғағын бұзуымыз керек еді, алайда біз оны жүзеге асыра алмадық», - деді Мбаппе.

Франция құрамасы матчтың 80-минутына дейін қарсылас қақпасына бірде-бір рет тура соққы жасай алмады. Бұл команданың Дидье Дешам басқаратын тактикалық жүйесінің бұл ойында тиімсіз болғанын көрсетеді. Капитан тактикалық қателіктермен қатар, команданың техникалық тұрғыдан да көптеген қателіктер жібергенін мойындап, капитан ретінде нәтижеге жауапкершілік өзінде екенін жеткізді.

Франция сапындағы ойыншы Райан Шерки де өз кезегінде команданың бүгінгі кездесудегі деңгейіне қатысты қатты сын айтты. Оның пайымдауынша, француздарға тек тактика ғана емес, жеңіске деген ерік-жігер мен шеберлік жетіспеді.

Осы жеңілістен кейін Франция құрамасы енді әлем чемпионатының үшінші орын үшін өтетін кездесуіне дайындалады. Ал Испания құрамасы 20 шілдеге қараған түні финалда Англия мен Аргентина жұбының жеңімпазымен бас жүлдені сарапқа салады.