Киік етін қайдан сатып алуға болады?

Киік етін Қазақстандағы базар сөрелерінен әзірге табу мүмкін емес. Ауыл шаруашылығы министрлігі ет өңдеуші кәсіпорындарға өнімді килограмын 1 600 теңгеден сатуды ұсынғанымен, бұл ұсыныс бөлшек саудада іске асырылмаған, деп хабарлады Kazinform.

Сауда және интеграция министрлігінің мәліметінше, өңірлерден жиналған деректер бойынша киік еті базарларда сатылмайды. Көп жағдайда фермерлер етті тікелей өңдеу цехтарына өткізеді.

Ауыл шаруашылығы министрлігі де бұл ақпаратты растап отыр. Ведомство өкілдерінің айтуынша, өңдеушілер етті алдын ала берілген тапсырыстар бойынша тұтас күйінде ғана сатады. Ал дайын өнімнің бір бөлігі консерві жасауға жіберіледі.

Бүгінде киік етінен консерві өндіретін кәсіпорындар қатарында «Кублей» ЖШС, «Торғай ет» ЖШС және «Ұлы дала К» ЖШС бар. Сондықтан бұл өнім нарықта, ең алдымен, консервіленген түрде пайда болуы ықтимал.

Ресми мәліметке сәйкес, ел бойынша тәулігіне 4 140 киікті союға қауқарлы 25 қасапхана жұмыс істейді. Осы уақытқа дейін 4 374 киікті союға 108 ветеринариялық анықтама берілген.

Еске салайық, шілде айынан бастап Қазақстанда киік санын реттеу мақсатында ату жұмыстары жүргізіліп жатыр.