Киік етін қай қалаларда және қанша теңгеден сатып алуға болады?

Тамыз айынан бастап Қазақстанда киік етін сату басталды. Informburo.kz мәліметінше, еліміздегі сегіз өңірде орналасқан 21 арнайы пунктте 40 мыңнан астам киік сойылған. Олардың еті өңделіп, аймақ ішінде де, басқа облыстарға да жөнелтіліп жатыр.

Киік етінің бағасы өңірлер бойынша мынадай:

• Астана, Алматы – 1600 теңге/кг;

• Ақтөбе, Тараз – 1300 теңге/кг;

• Жезқазған, Қостанай, Қызылорда, Орал – 1500 теңге/кг;

• Қостанай облысының ауылдары – 1200 теңгеден;

• Маңғыстау облысының елдімекендері – 1300 теңгеден;

• Батыс Қазақстан облысы – 1300 теңгеден.

Сонымен қатар Батыс Қазақстан облысында «Кублей» компаниясы шамамен 10 мың киіктің етін сатып алып, консерві дайындауды жоспарлап отыр. Бағасы – 1300 теңге/кг.

Астанада сұраныс аса жоғары емес: мұнда бар болғаны 2698 туша сатылды. Алматыда – 389. Ал ең көп ет Батыс Қазақстан облысында өткізілді – шамамен 16 мың туша.

Бұған дейін Ауыл шаруашылығы министрлігі киік етін 1600 теңге/кг бағамен сатуды ұсынған еді.

Айта кетейік, маусым айының соңында Қазақстанда киік популяциясын реттеу туралы шешім қабылданған. Қазіргі таңда олардың саны 3,9 миллион басқа жеткен. Бұл қадам ғылыми қорытындыларға, фермерлердің ұсыныстарына және әлемдік тәжірибеге сүйене отырып жасалған.