Келесі АЭС Абай облысында салынуы мүмкін

Президент Қасым-Жомарт Тоқаев Абай облысында атом электр станциясын салу перспективасын ескере отырып, Курчатов қаласында жаңа ғылыми қалашықтың егжей-тегжейлі жоспарын дайындау қажет екенін айтты. Бұл туралы ол Ғылым және технологиялар жөніндегі ұлттық кеңестің отырысында мәлімдеді.

"Абай облысында АЭС салу перспективасын назарға ала отырып, Курчатовтағы ғылыми қалашықтың нақты жоспары әзірленуі тиіс. Бұл іске Ғылым академиясы, облыс әкімдігі және Ұлттық ядролық орталық қатысуы керек. Қалашықта инженерлік және өндірістік нысандарды орналастыруға жағдай жасалуы қажет. Сондай-ақ ядролық инфрақұрылымды нығайту үшін мемлекет-жекеменшік серіктестігінің тиімді тетіктерін әзірлеу міндеті тұр", – деді Тоқаев.