«Келешек» бағдарламасы: 5 жастағы 15 мыңнан астам баланың AQYL депозитіне 3,9 млрд теңге аударылады

«Отбасы банк» акционерлік қоғамы «Келешек» мемлекеттік бағдарламасы аясында бес жасқа толған балалардың білім беру депозитіне бастапқы капиталдың аударылатынын хабарлады.

Биылғы жылдың алғашқы жартыжылдығында 5 жасқа толған 15 085 бүлдіршіннің AQYL білім беру депозитіне жалпы сомасы 3,9 миллиард теңге көлемінде мемлекеттік қаржы аударылады. Ал екінші жартыжылдықта бес жасқа толатын балалардың есепшотына тиісті қаражат 2027 жылдың ақпан айында түседі. Осылайша, жыл қорытындысы бойынша 29 099 бала бастапқы білім капиталымен қамтамасыз етіліп, мемлекеттік қолдаудың жалпы сомасы 7,5 миллиард теңгені құрайды.

Бастапқы капиталды сақтап қалу үшін ата-аналар бала кәмелетке толғанға немесе оқу орнына түскенге дейін депозитті жыл сайын толықтырып отыруы қажет. Биылғы жылы ең төменгі жылдық жарна мөлшері 24 АЕК-ті (103 800 теңге) құрайды, ал халықтың әлеуметтік осал топтары үшін бұл көрсеткіш 12 АЕК (51 900 теңге) деңгейінде белгіленген. Жетім және ата-анасының қамқорлығынсыз қалған балалар үшін міндетті жарна салу талап етілмейді.

AQYL депозитіндегі жинақталған қаражат банк ұсынатын 13,84% сыйақы (ЖТСМ 14,75%-дан басталады) және 5% (кейбір санаттар үшін 7%) мөлшеріндегі мемлекеттік сыйақы есебінен ұлғаяды. Бала 18 жасқа толғанда жиналған қаражатқа «Ұлттық қор – балаларға» бағдарламасы бойынша бөлінедін қаржыны қосып, оны оқу ақысын төлеуге жұмсауға болады. Мемлекеттік бағдарлама іске қосылғалы бері «Отбасы банк» арқылы 35 070 бала жалпы сомасы 8,2 миллиард теңгеге тең бастапқы капиталға ие болды.