Келер жылы Ұлттық қордан балаларға берілетін төлемдер өседі

2025 жылдың қаңтарында қазақстандық балалардың шоттарына аударылатын Ұлттық қор төлемі өткен жылғыдан жоғары болады. Бұл туралы Ұлттық банктің төраға орынбасары Әлия Молдабекова мәлімдеді. Оның айтуынша, төлемнің көбеюіне қордың инвестициялық кірісінің артуы себеп болып отыр.

«Қаражат қаңтар айында шоттарға аударылады. Өткен жылы әр балаға шамамен $100 аударғанымыз есіңізде шығар. 2023 және 2024 жылдар инвестициялық кіріс тұрғысынан өте оң нәтиже берді. Сондықтан сырғымалы орташа көрсеткіш өсіп келеді. Қаңтардағы сома былтырғыдан жоғары болады», — деді ол брифингте.

Дегенмен Молдабекованың айтуынша, нақты төлем мөлшері әлі белгісіз, себебі ол 2025 жылдың қаңтарындағы балалар санына байланысты анықталады.

Еске салайық, биыл ақпанда «Ұлттық қор – балаларға» бағдарламасы аясында зейнетақы қорына алғашқы мақсатты жинақтар аударылған болатын. Әр балаға бірдей мөлшерде $100,52 (44 мың теңгеден астам) көлемінде қаражат түсті.