Келер жылдан бастап кейбір қазақстандықтар үшін МӘМС жарнасы 5 есе өседі

Қазақстанда міндетті әлеуметтік медициналық сақтандыру (МӘМС) жарнасын төлеудің жоғарғы шекті мөлшері 2026 жылдың 1 қаңтарынан бастап бес есе ұлғаймақ. Бұл туралы Мәжілісте заңға енгізілетін өзгерістерді таныстыру барысында Денсаулық сақтау министрі Ақмарал Әлназарова мәлімдеді.

Жаңа түзетулерге сәйкес, жарна төлеу шегінің жоғарғы мөлшері қазіргі 10 ең төменгі жалақыдан (шамамен 850 мың теңге) 50 ең төменгі жалақыға (шамамен 4,2 млн теңге) дейін көбейеді.

«Бұл өзгеріс барлық жалдамалы жұмысшылар мен олардың жұмыс берушілерінің 9%-ына немесе шамамен 508 мың адамға әсер етеді. Қазіргі таңда жалақысы жоғары азаматтар МӘМС-ке пропорционалды түрде аз жарна төлейді», – деді министр.

Министрліктің хабарламасында айтылғандай, МӘМС жүйесі әділ қаржыландыру қағидатына негізделуі тиіс. Яғни, азаматтардың табысына қарамастан жарналар тең болуы қажет.

«Мысалы, айлығы 1 млн теңге болатын адам үшін МӘМС жарнасының шекті мөлшері 10 ЕТЖ бойынша және белгіленген 2% мөлшерлемемен есептелгенде нақты төлем мөлшері небәрі 1,7%-ды құрайды. Ал айлығы 400 мың теңге болатын адам толық 2% төлейді. Осылайша, жоғары табыс алатын азаматтардың нақты жарнасы бар болғаны 0,4% деңгейінде қалады. Мұндай жағдайда әлеуметтік әділдік пен теңдік принципі сақталмай отыр», – делінген министрлік ақпаратында.

Бұған қоса, министр Әлназарова екінші кезеңде – 2027 жылдан бастап – МӘМС жүйесіне мемлекеттік жарна мөлшерлемесін біртіндеп көтеру көзделгенін атап өтті. Бұл Қазақстанды аталған заңның алғашқы нұсқасында, яғни 2015 жылы бекітілген қаржылық модельге қайта оралтпақ. Сол кезде мемлекеттік жарна мөлшерлемесі 7% деңгейінде болса, қазір ол 2%-ға дейін төмендетілген.