ҚазМұнайГаз мұнайды аз өндірсе де, рекордтық пайда тапты: себебі неде?

«ҚазМұнайГаз» 2026 жылдың алғашқы алты айында 904 млрд теңге таза пайда тапты. Бұл былтырғы осы кезеңмен салыстырғанда 69,1 пайыз көп. Осы уақытта компанияның мұнай және газ конденсатын өндіру көлемі 4,6 пайыз азайып, 12,44 млн тоннаны құрады.

Компанияның жарты жылдағы түсімі 23,7 пайыз өсіп, 5,57 трлн теңгеге жетті. EBITDA көрсеткіші 45 пайыз артып, 1,66 трлн теңгені, ал еркін ақша ағыны 765 млрд теңгені құрады.

Қаржылық көрсеткіштердің жақсаруына мұнай бағасының өсуі ықпал еткен. Қаңтар-маусым аралығында Brent маркалы мұнайдың орташа әлемдік бағасы барреліне 92,31 доллар болды. Бір жыл бұрын бұл көрсеткіш 71,87 доллар еді. Бұл – әлемдік бағдарлық баға, ҚазМұнайГаз сатқан мұнайдың нақты орташа бағасы емес.

Өндірістік көрсеткіштердің бір бөлігі, керісінше, төмендеген. Мұнай және газ конденсатын өндіру 4,6 пайыз, газ өндіру 4,7 пайыз, мұнай өңдеу көлемі 1,5 пайыз азайды. Ал мұнай тасымалдау 4 пайыз өсіп, 43,28 млн тоннаға жетті.

ҚазМұнайГаздың бірлескен және қауымдастырылған компаниялардан алатын пайда үлесі 53,9 пайыз өсіп, 537 млрд теңгеге жеткен. «Теңізшевройлдан» түскен дивиденд те 328 млрд теңгеден 441 млрд теңгеге дейін артты.

Сонымен қатар компанияның таза қарызы 983 млрд теңгеге жетіп, 162,2 пайыз өсті. ҚазМұнайГаз мұны негізінен қолдағы ақша мен депозит көлемінің азаюымен, соның ішінде қаражаттың бір бөлігін «Самұрық-Қазына» облигацияларына салумен байланыстырады.

ҚазМұнайГаз акцияларының 90,42 пайызы «Самұрық-Қазына» қорына тиесілі. Компания 2025 жылдың қорытындысы бойынша акционерлеріне 350 млрд теңге дивиденд төлеген.