Қазақстанның ракқа қарсы дәрісі қашан қолданысқа шығады?

Ғылым және жоғары білім министрі Саясат Нұрбек Қазақстанда өңдірілген жаңа қатерлі ісікке қарсы дәрінің клиникалық сынақ нәтижелері туралы айтып берді. Оның айтуынша, сынақтар сәтті өтіп жатыр.

"Биыл клиникалық сынақтардың екінші кезеңі басталды. Бірінші кезеңде біз тек шағын топты, ауыр және агрессивті тоқ ішек обырына шалдыққан науқастарды ғана сынаған едік. Биыл дәріні жан-жақты сынау үшін әртүрлі қатерлі ісік түрлеріне және әртүрлі дозаларда зерттеу жүріп жатыр. Үш қалада – Алматы, Астана және Павлодарда мыңдаған адам қатысып жатыр. Сынақтарды келесі жылдың ортасына дейін аяқтауды жоспарлап отырмыз, содан кейін дәріні тіркеуге жібереміз", – деді Саясат Нұрбек.

Министрдің айтуынша, белгілі ғалым Дос Сарбасовтың АҚШ-тан оралуы сынақтарды жылдам бастау мүмкіндік берді. Егер сынақтар ойдағыдай аяқталса, келесі жылдан бастап бұл дәрі Қазақстанның онкологиялық орталықтарында қолданылуы мүмкін.

"Тіркеуден өткеннен кейін дәрі онкологиялық орталықтарға жеткізіліп, емдеу барысында қолданылатын болады. Бірақ сынақтар міндетті түрде аяқталуы қажет, олардың нәтижелері Қазақстанның Дәрілік заттарды тіркеу ұлттық орталығында тексеріледі. Бұл үдерісте Денсаулық сақтау министрлігі үлкен көмек көрсетіп жатыр, біз министрлікке және оның ұжымына алғысымызды білдіреміз. Кейбір процестерді параллель түрде бастауға рұқсат беріп, зерттеу жұмыстарын жеделдетуде қолдау көрсетіп жатыр", – деп атап өтті министр.

Саясат Нұрбектің айтуынша, қазіргі уақытта препараттың кері әсері тіркелмеген, емделушілердің кейбірінде ісік көлемі 30-40%-ға дейін азайған.

"Барлығы өте жақсы жүріп жатыр. Бізде жақсы нәтиже бар, емделушілерде айтарлықтай оң өзгерістер байқалады. Сондықтан үмітіміз зор", – деді министр.