Қазақстанның курорттық аймақтарында үш жаңа әуежай салынады

2026 жылы Қазақстанның курорттық аймақтарында үш жаңа әуежайдың құрылысы аяқталады. Сонымен қатар, Алакөл бағытына қосымша поездар іске қосылады, деп хабарлайды Үкіметтің баспасөз қызметі.

Көлік министрі Нұрлан Сауранбаев Үкімет отырысында мәлімдегендей, 2026 жылы Катонқарағай, Зайсан және Кендірлі курорттық аймақтарында әуежайлар құрылысы толығымен аяқталады. Бұдан бөлек, Арқалық қаласындағы әуежай қайта қалпына келтірілмек.

Жаңа әуе бағыттары: Вена, Рим және Шанхай сияқты қалаларды қоса алғанда, 15 жаңа халықаралық маршрут ашылады.

Теміржол тасымалы: Поезд паркі 191 жаңа вагонмен толығады. Жазғы маусымда 13 қосымша маршрут іске қосылып, бұл 400 мың қосымша орынды қамтамасыз етеді.

Жол жөндеу: Негізгі көрікті жерлерге баратын 5 мың шақырым жол жөнделуде. Оның ішінде «Жаңаөзен – Кендірлі» және «Өскемен – Катонқарағай» бағыттары бар.

«Танымал бағыттарға ерекше көңіл бөлінді. Мәселен, Алакөл көліне дейін Астана, Алматы және шығыс өңірлерден сегіз қосымша поезд қатынайтын болады», - деп атап өтті министр.

Сонымен қатар жол бойындағы сервис те дами түспек: 2026 жылы 50 жаңа нысан салу жоспарланған. Бұл шаралар жол жүру уақытын қысқартып, туристер үшін жайлылықты арттыруға бағытталған.