Қазақстанның IT-қызметтер экспорты 1,1 млрд доллардан асты

2025 жылдың қорытындысы бойынша Қазақстанның технологиялық секторы тарихи белесті бағындырды. Ұлттық Банктің деректеріне сәйкес, отандық IT-қызметтер экспортының көлемі 1,142 млрд АҚШ долларына жетті. Бұл көрсеткіш еліміздің технологиялар импортына тәуелділіктен арылып, «таза экспорттаушы» мемлекетке айналғанын айғақтайды. Қазіргі таңда қазақстандық цифрлық шешімдерді сатудан түскен табыс сырттан келетін импортқа жұмсалатын шығыннан 2,6 есеге артық.

Бүгінде қазақстандық IT-өнімдер әлемнің 110-нан астам елінде жоғары сұранысқа ие. Бұл жетістіктің басты драйвері — Astana Hub халықаралық технопаркі. Оның резиденттері 2025 жылы 633 млн доллар көлемінде экспорттық табыс әкелген. Қазіргі уақытта Германия, Испания, Нидерланды және БАӘ сияқты ірі нарықтарда 537 отандық компания белсенді жұмыс істеп жатыр.

Салада 32,5 мыңнан астам білікті маман еңбек етуде.Бұл жоба 6 мыңнан астам шетелдік сарапшының Қазақстанның цифрлық инфрақұрылымына қосылуына жағдай жасады.

ҚР Жасанды интеллект және цифрлық даму министрлігі (ЖИЦДМ) отандық инновацияларды әлемдік құн тізбегіне интеграциялауды жалғастыруда. Қазақстанның технологиялық ықпалы тек Кремний алқабымен шектелмей, Шанхай мен Дубайдағы халықаралық хабтар арқылы кеңейіп келеді.

Биылғы дамудың жаңа векторы — Оңтүстік-Шығыс Азия. Ташкентте өткен CEVF 2026 форумы аясында Astana Hub пен IT Park Uzbekistan арасында Малайзияда бірлескен технологиялық хаб ашу туралы келісім жасалды. Бұл қадам қазақстандық стартаптар үшін Азияның жаңа қаржылық нарықтарына тікелей жол ашады.

«1 миллиард долларлық меже — бұл мемлекеттік қолдау шаралары мен экожүйенің кемелденгенінің басты көрсеткіші. Біздің мақсатымыз — қазақстандық IT-компаниялардың жаһандық цифрлық экономиканың ажырамас бөлігіне айналуына жағдай жасау» деп атап өтті ҚР ЖИЦДМ Цифрлық активтер және серпінді технологиялар комитетінің төрағасы Ғиззат Байтұрсынов.

Бүгінде Silkway Accelerator және Hero Training сияқты бағдарламалар отандық идеяларды әлемдік деңгейдегі бәсекеге қабілетті экспорттық өнімге айналдырудың негізгі құралы болып отыр.