Қазақстанның ірі жеңісі: Халықаралық сот Қарашығанақ алпауыттарын миллиардтаған доллар төлеуге міндеттеді

Bloomberg агенттігінің хабарлауынша, Лондонда өткен халықаралық арбитраж Қарашығанақ кен орнының операторларын Қазақстанға 2 миллиардтан 4 миллиард долларға дейін өтемақы төлеуге міндеттеді. Бұл шешім еліміздің мұнай-газ секторындағы ең ірі құқықтық жеңістерінің бірі ретінде бағалануда.

Сот талқылауы Стокгольм арбитражының ережелері бойынша өтті. Арбитраж Қазақстан үкіметінің позициясын толықтай негізді деп танып, өнімді бөлу туралы келісім аясында бекітілмеген артық шығындар мен өтелуге жатпайтын өзге де шығындарды қайтаруды талап етті. Бастапқыда Қазақстан тарапы 6 миллиард доллардан астам қаражат сұрағанымен, қазіргі бекітілген соманың өзі ел қазынасы үшін айтарлықтай табыс болмақ.

Қарашығанақ жобасына Eni, Shell, Chevron, Lukoil және отандық «ҚазМұнайГаз» компаниялары қатысады. Халықаралық алпауыттардың «талап қою мерзімі өтіп кетті» деген уәждерін сот қабылдамай тастады. Енді миллиардтаған доллар өтемақы мұнайды бөлу формуласын түзету арқылы кезең-кезеңімен қайтарылмақ. Қазіргі уақытта төлемнің нақты сомасы нақтылануда және тараптардың бұл шешімге шағым түсіруге құқығы бар.