Қазақстанның халық жазушысы Исраил Сапарбай дүниеден өтті

85 жасқа қараған шағында Қазақстанның халық жазушысы, белгілі ақын, драматург әрі сазгер Исраил Сапарбай өмірден озды. Қаралы хабарды Жазушылар одағы төрағасының орынбасары Қасымхан Бегманов өзінің Facebook парақшасында растады.

"Бүгін таңнан суық хабар жетті. Таңғы сағат төрт шамасында аса көрнекті ұлт ақыны, Тәуелсіз "Платиналы Тарлан" сыйлығының лауреаты Исраил Сапарбай ағамыз дүниеден өтті. Ағамыз Қаскелеңдегі қара шаңырағында, бала-шағасының алдында ауыр науқастан қайтқанын ұлы Нұрлан Исраилұлы хабарлады", – деп жазды ол.

Исраил Сапарбай 1941 жылы 15 мамырда Өзбекстанның Самарқанд облысындағы Кушрабад ауылында дүниеге келген. Ол — қазақ әдебиеті мен өнерінде өзіндік қолтаңбасын қалдырған шығармашылық иесі.

Ақынның қаламынан туған танымал жыр жинақтарының қатарында «Аққу арман», «Раушан ғұмыр», «Бозқараған», «Қызыл-жасыл дүние», «Жүрегіме ұя салған қарлығаш», «Қызыл жел», «Ғашықтың тілі» атты туындылары бар. Ол — 70-тен астам ән мен 150-ге жуық ән мәтінінің авторы.

Сонымен қатар Сапарбайдың «Ауылдан келген ару», «Әмір-Темір», «Абай-Тоғжан», «Сыған серенадасы», «Махаббат мейрамы» сынды пьесалары еліміздің театр сахналарында үлкен табыспен қойылып келеді.

Ұлт руханияты ауыр қазаға ұшырады. Қазақ поэзиясы мен драматургиясында терең ізі қалған қаламгердің жарқын бейнесі ел жадында мәңгі сақталады.