Қазақстаннан АҚШ пен Жапонияға тікелей рейстер қашан ашылады?

Қазақстандықтардың ұзақ жылдар бойы армандаған Токио мен Нью-Йорк қалаларына тікелей ұшу мүмкіндігі орнайтын күн белгілі болды. Көлік министрі Нұрлан Сауранбаев Үкімет отырысында шетелге қатысты жаңа әуе бағыттарының нақты уақытын жариялап, сенсациялық мәлімдеме жасады.

Министрдің сөзіне қарағанда, Күншығыс еліне, яғни Жапонияның астанасы Токиоға алғашқы тікелей рейс осы жылдың төртінші тоқсанында (қазан-желтоқсан айларында) жол тартпақ. Ал мұхиттың арғы бетіндегі Америка Құрама Штаттарына қатысты рейстер сәл кейінге шегерілген.

«АҚШ-қа тікелей рейстер келесі жылдың екінші тоқсанында, яғни сәуір-маусым айларында ашылады», -деді Сауранбаев.

Естеріңізге сала кетейік, бұған дейін АҚШ-қа тікелей рейс 2025 жылдың соңында ашылады деп жоспарланған болатын. Алайда, әлемдік алып авиаконцерндер Boeing пен Airbus компанияларының ұшақтарды жеткізу мерзімін кешіктіруі бұл жоспарға айтарлықтай түзетулер енгізді. Бірақ бұл жолы билік нақты мерзімді бекітіп отыр.

Министрлік мұнымен тоқтап қалмақ емес. Қазіргі уақытта Астанадан 34 халықаралық бағыт бойынша ұшақтар қатынап жатса, жыл соңына дейін тағы 5 жаңа халықаралық әуе бағыты іске қосылмақ. Бұл қазақстандықтар үшін әлемнің кез келген нүктесіне ауысып отырусыз, жылдам әрі жайлы жетуге үлкен жол ашады.