Қазақстанға биыл 40 млрд теңгенің заңсыз шығарылған активі қайтарылды

Жыл басынан бері Қазақстанға заңсыз шығарылған 40 млрд теңгенің активі қайтарылды. Оның 37,7 млрд теңгесі ақшалай қаражат болса, 2,3 млрд теңгесі мүлік түрінде қайтарылған. Бұл туралы Бас прокуратура хабарлады.

Ведомство мәліметінше, қайтарылған қаражат әлеуметтік нысандар салуға бағытталып жатыр. Бүгінде осы қаражат есебінен 39 жоба іске асырылған. Олардың қатарында Ақтаудағы жедел жәрдем стансасы, Шымкенттегі студенттер жатақханасы, Астанадағы Қажымұқан Мұңайтпасов атындағы футбол стадионы және жаңғыртылған Балқаш әуежайы бар.

Сондай-ақ қабылданған шаралар нәтижесінде мемлекетке жалпы көлемі 147 млрд теңге өтелген. Бұл сомаға мүлік, салықтар, экологиялық залал және өзге де төлемдер кіреді.

Бас прокуратураның мәліметінше, мемлекеттік қаражатты заң бұза отырып жұмсаудың алдын алу бағытында да жұмыс жүргізілген. Нәтижесінде 342 млрд теңге көлеміндегі заңсыз шығындардың жолы кесілген. Негізгі назар негізсіз шығын жоспарлау, бәсекелестікті шектеу және артық тауарлар мен қызметтерді сатып алу фактілеріне аударылған.

Қазір прокурорлардың сүйемелдеуімен үш мыңнан астам инвестициялық жоба жүзеге асырылып жатыр. Сонымен қатар Қазақстанға 27 адам экстрадицияланып, шетел мемлекеттеріне 70 адам тапсырылған.