Қазақстандықтарға нөмірлері мен смартфондарын бөтен адамдарға беруге тыйым салынуы мүмкін

Бұл шектеулер жақын туыстарға қолданылмайды. Қазақстан азаматтарына абоненттік нөмірлері мен смартфондарын үшінші тұлғаларға беруге тыйым салу жоспарлануда. Тиісті норма телекоммуникация нарығы мен деректерді өңдеу орталықтарын дамыту мәселелері бойынша кейбір заңнамалық актілерге өзгерістер мен толықтырулар енгізу туралы заң жобасына енгізілді.

Құжатқа сәйкес, елде абоненттік нөмірді және ұялы байланыс құрылғысын үшінші тұлғаларға беруге тыйым салынады. Алайда, бұл шектеулер жақын туыстарға таралмайды.

«Биометриялық сәйкестендіру бойынша нормалар Цифрлық кодекске сәйкес келтірілуде. Сондай-ақ, ұялы байланыс құрылғыларын верификациялау арқылы оларды тіркеу процедурасын жетілдіру қарастырылған. Бұл елге заңсыз әкелінген және «сұр» құрылғыларды пайдалануды азайтуға, сондай-ақ IMEI-кодты ауыстыру арқылы жасалатын алаяқтық схемалардың тәуекелдерін төмендетуге мүмкіндік береді», - деп атап өтті Премьер-министрдің орынбасары - Жасанды интеллект және цифрлық даму министрі Жаслан Мәдиев.