Қазақстандықтардың жеке деректері интернетте сатылған

Қазақстанда азаматтардың жеке дерегін заңсыз жинап, таратты деп күдіктелген топтың қызметі тоқтатылды, деп хабарлады Ұлттық қауіпсіздік комитеті. Арнайы операция наурыз айында Астана мен Алматыда прокуратураның үйлестіруімен жүргізілген.

Тергеу мәліметінше, күдіктілер заңсыз алынған ақпаратты интернетте сатып отырған. Сатып алушылардың қатарында микрокаржы ұйымдары мен коллекторлық компаниялардың өкілдері, сондай-ақ жеке тұлғалар болған.

Аталған дерек бойынша қылмыстық іс қозғалып, үш бап бойынша тергеу жүргізіліп жатыр. Олар – жеке өмірге қол сұғу және дербес деректер туралы заңнаманы бұзу, ақпаратты заңсыз иелену және зиянды бағдарламаларды жасау немесе тарату.

Тінту барысында компьютерлік техника, электронды ақпарат тасымалдағыштар, ірі көлемдегі ақша және басқа да айғақ заттар тәркіленген.

Қазіргі уақытта сотқа дейінгі тергеу жалғасып жатыр.