Қазақстандықтардың жалақы талабы 4,2 млн теңгеге дейін өсті

Қазақстан Республикасының Еңбек және халықты әлеуметтік қорғау министрлігі еңбек нарығындағы соңғы жағдай туралы есеп берді. Наурыз айының қорытындысы бойынша, бос жұмыс орындары мен түйіндемелер (резюме) саны арасындағы алшақтық айтарлықтай қысқарып, нарық теңесу сатысына өтті.

Enbek.kz электрондық еңбек биржасының мәліметінше, наурыз айында жұмыс берушілер 102,6 мың бос жұмыс орнын ұсынса, жұмыс іздеушілер тарапынан 107,1 мың түйіндеме жарияланған. Егер қаңтар айында бұл айырмашылық 60 мыңға жеткен болса, қазіргі таңда небәрі 4,5 мыңды құрап отыр.

Ақпан айымен салыстырғанда:

• Жұмыс күшіне деген сұраныс 3,7%-ға өскен;

• Ұсыныс көлемі (түйіндемелер) 14,3%-ға азайған.

Зерттеу нәтижелері көрсеткендей, соискательдердің жалақы бойынша талаптары жұмыс берушілердің ұсыныстарынан едәуір жоғары.

Ең жоғары ұсынылатын жалақылар:

• Заң жұмысы бойынша бөлім бастығының орынбасары — 1,4 млн теңге;

• Бағдарламалық қамтамасыз ету архитекторлары — 1,38 млн теңге;

• Өндіріс бастықтары (өндіруші өнеркәсіп) — 1,14 млн теңге.

Кандидаттардың күтетін жалақылары:

• HR бизнес-серіктестер — 4,2 млн теңге;

• Каротаждық жұмысшылар — 3 млн теңге;

• Өнеркәсіптік зертхана басшылары — 2,5 млн теңге.

Бос жұмыс орындарының ең көп саны білім беру (22,6 мың), денсаулық сақтау және ауыл шаруашылығы салаларында байқалады. Өңірлер бойынша Түркістан, Қарағанды облыстары және Астана қаласы кадрларға ең көп қажеттілік туындаған аймақтар қатарында.

Жұмыс іздеушілердің басым бөлігін жастар құрайды: кандидаттардың 42%-ы 35 жасқа дейінгі азаматтар. Сондай-ақ, түйіндеме қалдырғандардың 54%-ы әйелдер болса, 46%-ы ерлер екені анықталды.

Бұған дейін сарапшылар Қазақстандағы «зумерлер» буыны еңбек нарығына жаңа талаптар енгізіп, мансаптық жылдам өсуді қалайтынын және бір жұмыс орнында ұзақ тұрақтап қалмайтынын атап өткен болатын.