Қазақстандықтардың несиелік қарызы 21,7 трлн теңгеге жетті

Қазақстандықтар тұтынушылық және ипотекалық несиелерді белсенді түрде рәсімдеуді жалғастыруда. ҚР Қаржы нарығын реттеу және дамыту агенттігінің мәліметінше, 2025 жылғы сәуірде халыққа берілген жалпы несиелер көлемі 1,5%-ға артып, 21,7 трлн теңгеге жеткен.

Бұл өсім, ең алдымен, тұтынушылық несиелердің 1,9%-ға ұлғайып, 14,7 трлн теңгеге жетуі және ипотекалық несиелердің 1,2 трлн теңгеге өсуі есебінен қамтамасыз етілген.

Несиеге деген сұраныс жоғары пайыздық мөлшерлемелерге қарамастан артып отыр. 2025 жылғы сәуірде теңгемен берілген тұтынушылық несиелер бойынша орташа сыйақы мөлшерлемесі 21,2%-ды құрады. Бұл өткен аймен салыстырғанда (20,4%) өсім көрсетіп отыр. Жалпы, халыққа берілген барлық несиелер бойынша орташа мөлшерлеме 19,9%-ға жеткен.

Сондай-ақ, кәсіпкерлік субъектілеріне берілген несиелер көлемі де 2,9%-ға артып, 13,3 трлн теңгені құрады. Бұл өсім негізінен айналым қаражатын толықтыруға бағытталған несиелердің ұлғаюымен байланысты.

Агенттіктің мәліметінше, 2025 жылғы 1 мамырдағы жағдай бойынша халыққа берілген проблемалық несиелердің көлемі 906 млрд теңге немесе жалпы портфельдің 4,2%-ын құраса, кәсіпкерлік несиелер бойынша бұл көрсеткіш 2,3% немесе 354 млрд теңгеге тең.