Қазақстандықтар жүргізуші куәлігін eGov арқылы онлайн ауыстыра алады

Биылғы қаңтардан бастап қазақстандықтар жүргізуші куәлігін eGov.kz порталы мен eGov Mobile қосымшасы арқылы онлайн ауыстыра алады. Бұл туралы eGov.kz Telegram-арнасында хабарланды. Қызметті куәлік мерзімі өтіп кеткен жағдайда да пайдалануға болады.

Қызметті алу үшін пайдаланушы «электрондық үкімет» порталында авторизациядан өтіп, «Азаматтарға» бөліміне, одан кейін «Көлік және коммуникациялар» – «Автомобиль көлігі» тармағына өтіп, «Жүргізуші куәліктерін беру» қызметін таңдауы қажет. Өтініш беруші дайын құжатты алатын ХҚКО-ны көрсетіп, фото, қолтаңба үлгісін жүктеп, байланыс телефонын енгізеді.

Сондай-ақ онлайн түрде мемлекеттік баж салығын төлеу керек (1,25 АЕК) немесе «Бұрын төленген» функциясын пайдалануға болады. Өтінімді қолжетімді тәсілдердің бірімен растау қажет. Қызмет нәтижесі жеке кабинетте көрінеді, ал дайын құжатты таңдалған ХҚКО-дан жеке куәлікті көрсетіп алуға болады.

Хабарламада кейбір жағдайда пайдаланушының құжат деректері мемлекеттік ақпараттық жүйелерде цифрландырылмаған болуы мүмкін екені ескертілген. Мұндай жағдайда жүйеде тиісті хабарлама шығып, деректерді жаңарту үшін ХҚКО-ға жеке бару қажет болуы ықтимал.