Қазақстандықтар тамаққа қанша жұмсайды?

Биыл қаңтар-наурыз аралығында орташа қазақстандық азық-түлік пен алкогольсіз сусындарға 131,3 мың теңге жұмсады, бұл бір жыл бұрынғыдан 6,7%-ға артық. Мұны Finprom.kz сарапшылары есептеді.

Осыдан бес жыл бұрын, яғни 2019 жылдың бірінші тоқсанында қазақстандықтар азық-түлік пен сусындарға жан басына шаққандағы орташа есеппен небәрі 72,3 мың теңге жұмсаған. Бұл биылғымен салыстырғанда екі есе дерлік аз.

Азық-түлік пен сусындарға ең көп шығындалған Алматы тұрғындары болды – жан басына шаққанда 181,5 мың теңге, бұл бір жыл бұрынғыдан 7,7%-ға артық. Республикалық орташа көрсеткішпен салыстырғанда алматылықтар 38,2%-ға көп жұмсаған.

Екінші және үшінші орындарды Шығыс Қазақстан (152,1 мың теңге, плюс 4,1%) және Маңғыстау (146,7 мың теңге, плюс 6,7%) облыстары иеленді.

Азық-түлік пен сусынға ең аз ақшаны Қызылорда (жан басына шаққанда 104,6 мың теңге), Ақтөбе (106,4 мың теңге) және Түркістан (110,4 мың теңге) облыстарының тұрғындары жұмсаған.

Еліміздегі 20 облыстың ішінде екі облыста – Ақтөбе және Алматы облыстарында ғана шығын азайған: жан басына шаққанда 5,1% және 4,3%-ға төмендеген. Ал ең көп жылдық өсім Жетісу облысында (19,8%-ға, жан басына шаққанда 141,3 мың теңгеге дейін), ең азы – Ақмола облысында (1,2%-ға, 112,4 мың теңгеге дейін) тіркелді.

Қазақстандықтардың азық-түлік пен алкогольсіз сусындарға жұмсаған барлық шығынының үштен бірі ет пен ет өнімдеріне тиесілі. Ол жан басына шаққанда 43,3 мың теңге болды. Бұл бір жыл бұрынғы көрсеткіштен 6,4 пайызға артық. Сондай-ақ қазақстандықтар төмендегі өнімдерге көп шығындалды:

• нан өнімдері мен жармаға – 20,5 мың теңге;
• сүт өнімдеріне – 14,5 мың теңге;
• жемістерге – 11,6 мың теңге;
• көкөністерге – 8,9 мың теңге.