Қазақстандықтар шетелде QR арқылы төлем жасай алады

Қазақстанның төлем нарығында барлық банктерге ортақ бірыңғай QR-кодты енгізу процесі басталды. Осы орайда, ұлттық жылдам төлемдер жүйесі мен QR-шешімдер базасында төлем инфрақұрылымын әзірлейтін Сингапурдың 8B халықаралық финтех-компаниясы Қазақстан нарығына шығатынын мәлімдеді.

8B компаниясы - штаб-пәтері Сингапурде орналасқан, Үндістан, Қытай, Вьетнам және Индонезия сияқты 30-дан астам елде табысты жобаларды жүзеге асырып жатқан халықаралық ұйым. Қазақстанда компания бірден үш негізгі бағыт бойынша жұмыс істейтін болады:

1. Туризм секторын қолдау

Отандық авиакомпаниялар, қонақ үйлер мен билет брондау жүйелері Қытай, Үндістан және Оңтүстік Кореядан келетін туристерден төлем қабылдау мүмкіндігіне ие болады. Төлемдер туристер үшін үйреншікті WeChat Pay, Alipay және UPI сияқты ұлттық құралдар арқылы жүзеге асырылады.

2. Шетелдегі QR-төлемдер

Енді Қазақстан азаматтары шетелде, соның ішінде Вьетнам мен Таиландта тауарлар мен қызметтер үшін өздерінің банктік қосымшаларындағы QR-жүйесі арқылы еш кедергісіз төлей алады. Бұл халықаралық есеп айырысу процесін айтарлықтай жеңілдетеді.

3. Халықаралық онлайн-сервистерді төлеу

Үшінші бағыт аясында қазақстандықтар халықаралық онлайн-платформалар мен сервистердің қызметіне Бірыңғай QR-код сияқты «отандық» төлем құралдарын пайдалана отырып ақы төлеу мүмкіндігін алады.

Бизнесті локализациялау аясында 8B компаниясы Қазақстандағы кеңсесін кеңейтіп, техникалық инфрақұрылымының бір бөлігін ел ішінде орналастыруды жоспарлап отыр. Барлық есеп айырысулар Қазақстан Республикасында лицензияланған «Zesta» ЖШС  төлем ұйымы арқылы жүргізіледі.