Қазақстандықтар өздерін қалаған уақытқа несие алудан шектей алады

Енді ҚР азаматтары eGov.kz порталында банктік қарыздар мен микрокредиттерді алудан шексіз уақытқа өз еркімен бас тарта алады. Бұл туралы "Ұлттық ақпараттық технологиялар" АҚ хабарлады.

Сервисті пайдалануға азаматтың өзі ғана өтінім бере алады. Несие мен шағын қарыздарды ресімдеуге тыйым салу мерзімсіз уақытқа қойылады. Сондай-ақ пайдаланушы кез келген уақытта несиелер мен қарыздарды алуға белгіленген шектеулерді алып тастай алады. Ол үшін eGov.kz порталында қызмет көрсетуді мерзімінен бұрын тоқтатуға өтінім беру қажет.

Қызметті алу үшін:

- eGov.kz порталында авторизациядан өтіп, «Кеден және салықтар» бөліміне өтіңіз;

- тізімнен «Экономика және қаржы» бөлімін таңдап, «Банктік несиелерді, микрокредиттерді алудан ерікті бас тарту» қызметін таңдаңыз;

- қажетті жолдарды толтырып, ЭЦҚ көмегімен өтінімге қол қойыңыз;

- көрсетілетін қызмет нәтижесімен Жеке кабинетте танысуға болады.

Бұрын белгіленген шектеулерді алып тастау үшін пайдаланушы:

- «Банктік несиелерді, микрокредиттерді алудан ерікті бас тарту» қызметін таңдаңыз;

- «Жазылудан бас тартқыңыз келе ме?» деген сұраққа «Иә» деп жауап беріңіз және қол қоюдың қолжетімді әдістерінің бірімен өтінімге қол қойыңыз.