Қазақстандықтар онлайн-сатып алуға 3,2 трлн теңге жұмсаған

Қазақстандықтардың 2024 жылдың 11 айында онлайн-сатып алуға жұмсаған қаржысы 3,2 трлн теңгеге жетті. Бұл туралы Үкімет отырысында Сауда және интеграция министрі Арман Шаққалиев мәлімдеді, деп хабарлайды Премьер-министрдің баспасөз қызметі.

Министрдің айтуынша, 2020 жылдан бері елімізде электрондық сауда көлемі 5 есе артқан. Дегенмен, Қазақстанның бұл көрсеткіші әлемдік орташа деңгейден әлі де төмен. Үкімет 2029 жылға дейін электрондық сауда көлемін 3 есеге ұлғайтып, 9,3 трлн теңгеге жеткізуді жоспарлап отыр. Бұл мақсатта арнайы онлайн-коммерцияны дамыту жоспары қабылданған.

Сонымен қатар, Сауда және интеграция министрлігі шетелдік онлайн-дүкендердің қызметін реттеуді қолға алмақ. Министр Арман Шаққалиев шетелдік маркетплейстерді тіркеу үшін электрондық платформа енгізуді ұсынды.

🔷 Жоспар бойынша шетелдік сауда алаңдарына мынадай міндетті талаптар қойылады:

• тауарлардың қауіпсіздігі мен контрафактіге қарсы күрес;

• тұтынушылардың құқықтарын қорғау;

• жеке деректерді сақтау мен қорғау;

• салықтық және кедендік ашықтықты қамтамасыз ету.

Мұндай шаралар Қазақстан азаматтарының шетелдік маркетплейстерге қатысты шағымдарының көбеюіне байланысты қабылданбақ.