Қазақстандықтар МӘМС бойынша төленіп қойған қызметке тағы да ақы төлеген

Бұл туралы 2022-2023 жылдарға арналған Әлеуметтік медициналық сақтандыру қоры қызметінің тиімділігіне жүргізілген мемлекеттік аудит қорытындысы бойынша белгілі болды, деп хабарлайды Жоғарғы аудиторлық палатасының баспасөз қызметі.

Бұл – осы саладағы екінші аудит. Аудит 13 ұйымды, сондай-ақ 3,8 трлн теңге қаражат пен активтерді қамтыды.

"Аудит барысында бірлесіп қызмет көрсетушілер тарапынан ӘМСҚ есебінен және азаматтардың өз есебінен медициналық қызметтерге қосарланған ақы төлеу фактілері анықталды. Негізінде қолданыстағы ережелер бойынша медициналық мекемелер ТМККК және МӘМС желісі бойынша қаржыландырылатын медициналық көмек түрлері үшін ақы алмауға міндеттеме алады. Сонымен стационарлық көмек бойынша кем дегенде 1,7 млрд теңгеге, амбулаториялық көмек бойынша 27,6 млрд теңгеге қосарланған төлем фактілері анықталды", – делінген хабарламада.

Жоғарғы аудиторлық палатаның мәліметінше, қор тарапынан бұл бағытта мониторинг жүргізілмейді.

Стоматологиялық клиникалар да қазақстандықтардан екі рет ақы алған. Медициналық сақтандыру тарифіне анестезияның құны енгізіліп қойған, бірақ стоматологиялар ол үшін қордан жалпы сомасы 2,1 млрд теңгеге қосымша ақы алған. 

Қор медициналық қызметтердің сапасын бақылауға тиісті назар аудармайды. Мәселен, Астана бойынша МӘМС шеңберінде екі ірі қызмет көрсетушіге бақылау тексерісі жүргізілді, оларға жиынтығында 179 мың адам бекітілген. Нәтижесінде олардың жеке орындары мен медициналық жабдықтардың жоқтығы, оларды сағатына жалға алатыны анықталды. Бұл қызмет көрсетуші ЖШС-лардың бірқатар клиникасында жекелеген қызмет түрлеріне лицензиялары және өздігінен  қозғала алмайтын азаматтарды қабылдауға арналған пандустары жоқ.

Сонымен қатар Денсаулық сақтау, Ішкі істер және Әділет министрліктерінің ақпараттық жүйелерінің деректерін салыстыру нәтижесінде шетелге тұрақты тұруға кеткен азаматтарға дәрі-дәрмектерді ресімдеу фактілері анықталды.

Мемлекеттік аудит барысында сонымен қатар биыл наурыз айындағы жағдай бойынша Қазақстандағы 109 медициналық ұйымның 19 млрд теңгеге мерзімі өткен кредиторлық берешегі бар екенін анықтады.

Жалпы аудит қорытындысы бойынша:

32 млрд теңгеден астам рәсімдік бұзушылықтар;

31,1 млрд теңгеге қаражатты тиімсіз жоспарлау және пайдалану анықталды.