Қазақстандықтар қатерлі ісікке тегін тексеріле алады

18 шілдеде Қазақстанның барлық мемлекеттік онкологиялық орталықтарында Ашық есік күні өтеді. Бұл жолғы акция сирек кездесетін қатерлі ісік түрі – саркоманы ерте анықтауға арналады, деп хабарлады Қазақ онкология және радиология ғылыми-зерттеу институты.

Бұл күні кез келген азамат алдын ала жазылмай-ақ және емхананың жолдамасынсыз онколог дәрігердің тегін кеңесін ала алады.

ҚазОРҒЗИ мәліметінше, Қазақстанда жыл сайын 150-ден астам адамға алғаш рет саркома диагнозы қойылады. Қазір бұл дертпен 1700-ден астам науқас диспансерлік есепте тұр.

«Сарапшылар жұмсақ тінде пайда болған әрі көлемі ұлғайып жатқан түйіндерге, сүйектегі ұзаққа созылған ауырсынуға немесе басқа да күмәнді белгілерге бейжай қарамай, дер кезінде дәрігерге қаралуға кеңес береді», – делінген институт хабарламасында.

Акция еліміздің барлық мемлекеттік онкологиялық орталықтарында өтеді.