$ 454.46 € 527.72 ₽ 5.25

Қазақстандықтар Каспий арқылы Әзербайжанға қайтадан пароммен бара алады

Абдрахманов Мағжан
09 қыркүйек 2026, 12:41
Қазақстандықтар Каспий арқылы Әзербайжанға қайтадан пароммен бара алады Сурет авторы: azertag.az

Қазақстан мен Әзербайжан Каспий теңізі арқылы жолаушылар тасымалын қайта жандандыруды жоспарлап отыр. Құрық пен Баку порттары арасындағы теңіз қатынасын қалпына келтіру жөніндегі ұсынысты Қазақстан жасаған, деп мәлімдеді Қазақстанның Әзербайжандағы елшісі Әлім Байел.

Елшінің айтуынша, Әзербайжан тарапы Қазақстанның ұсынысын қолдаған. Қазір екі елдің көлік саласына жауапты мекемелері жолаушылар қатынасын мүмкіндігінше тезірек қайта іске қосу бойынша жұмысқа кіріскен.

«Қазақстан мен Әзербайжан Каспийдегі жолаушылар тасымалын қайта жандандырады. Әзербайжан тарапының Қазақстан ұсынысын қолдағанына қуаныштымын. Қазір екі елдің көлік мекемелері жолаушылар қатынасын тезірек қалпына келтіру бойынша жұмысты бастады», – деді Әлім Байел.

Құрық пен Баку арасындағы жолаушылар тасымалы 2020 жылға дейін жұмыс істеген. Кейін COVID-19 індетіне байланысты тоқтатылған.

Елшінің мәліметінше, теңіз қатынасы тоқтағанға дейін бұл бағытпен жылына шамамен 1,5 мың адам жүрген. Ол бағыт қайта ашылғаннан кейін Каспий арқылы саяхаттағысы келетіндер саны артады деген үміт білдірді.

Қазір Қазақстан мен Әзербайжан арасында әуе қатынасы да бар. Бакуден Астана, Алматы, Шымкент, Ақтау және Атырауға аптасына жалпы 37 әуе рейсі орындалады.

#Әзербайжан #Паром #Каспий теңізі

Соңғы жаңалықтар