Қазақстандықтар қаржы пирамидаларына жыл басынан бері 20 млрд теңгеге алданған

Жыл басынан бері Қаржылық мониторинг агенттігі 20 миллиард теңгеге жуық шығын келтірген қаржы пирамидаларын құру және басқару бойынша 57 қылмыстық істі тергеді. Қазіргі уақытта 12 миллиард теңгеден астам қаражат өтелген. 

Агенттік алаяқтық жобалардың өмірлік циклін қысқартуға және оларға тартылған салымшылар санын азайтуға бағытталған «Қаржы пирамидаларына қарсы іс-қимыл» арнайы жобасын іске қосты. Осы жоба аясында Алматыда «HitBeatMusic» қаржы пирамидасын құру және басқару ісі бойынша тергеу аяқталып, қылмыскерлер сот үкімімен кінәлі деп танылды. Олар салымшыларды өздерін канадалық компанияның акционері ретінде таныстырып, шын мәнінде жобаға қатысы жоқ акцияларды сатып, 255 миллион теңге залал келтірген. Сот шешімі бойынша алаяқтар 5 жылдан 6 жылға дейін бас бостандығынан айырылды.

Агенттік IT-құралдарды қолдана отырып, әлеуметтік желілерде талдау жұмыстарын жүргізу үстінде. Биыл қаржы пирамидасының белгілері бар 10,5 мыңнан астам сайт сілтемесі және 292 чат («WhatsApp», «Telegram», «Instagram») бұғатталды, нәтижесінде 2 миллионнан астам әлеуетті салымшылардың қаржылық шығындарының алдын алды.

«Қаржы пирамидаларына қарсы іс-қимыл» жобасы басталғалы бері «Qnet», «World Business Consulting», «Finiko», «Antares», «Sincere Systems Group», «Hermes LTD», «Life is good», «Chia Tai Tianding», «Energy Eolus Oazqstan» секілді қаржы пирамидаларының ұйымдастырушылары жауапкершілікке тартылды.