Қазақстандықтар енді өзін құмар ойындардан 10 жылға дейін шектей алады

Қазақстанда құмар ойындардан шектеу қою мерзімі 10 жылға дейін ұзартылды. Бұған дейін азаматтар өзін 6 айдан 12 айға дейін шектей алса, енді бұл мерзім 10 жылға дейін ұзартылған. Қызметті eGov mobile қосымшасы арқылы пайдалануға болады.

Жаңартылған қызмет өтінімдерді өңдеу уақытын қысқартуға және өзін құмар ойындардан шектеу жүйесін жеңілдетуге мүмкіндік береді. Бұл кез келген азаматқа барлық лицензияланған ойын алаңдары мен онлайн букмекерлік платформаларға кіруді шектеуге мүмкіндік береді. Қызмет тек 21 жастан асқан адамдар үшін қолжетімді.

Қызметті пайдалану үшін мынадай қадамдар жасау қажет:

1. eGov mobile қосымшасына кіріп, «Қызметтер» → «Спорт» бөлімін таңдаңыз;
2. «Құмар ойындарға және (немесе) бәс тігуге қатысуға шектеу қою» қызметін таңдаңыз;
3. Шектеудің аяқталу жылын және айын көрсетіп, «Қызметке тапсырыс беру» батырмасын басыңыз;
4. Өтінішке Face ID/Touch ID арқылы қол қойыңыз.

Өтініш бергеннен кейін қолданушы автоматты түрде құмар ойындарға қатысуға шектеу қойылған тұлғалар тізіміне енгізіледі, әрі өтініш кері қайтарылмайды. Бұған дейін шектеу қойғандар үшін мерзімді ұзарту мүмкіндігі де қарастырылған.

Жаңартылған қызмет ҚР Цифрлық даму, инновациялар және аэроғарыш өнеркәсібі министрлігі Мемлекеттік көрсетілетін қызметтер комитеті, «Ұлттық ақпараттық технологиялар» АҚ және Туризм және спорт министрлігі Ойын бизнесін және лотереяны реттеу комитетімен бірлескен жұмысының нәтижесінде енгізілді.

Айта кетейік, бүгінге дейін 173 868 адам өзін құмар ойындардан шектеген.