Қазақстандықтар енді бір уақытта бірнеше банктен несие рәсімдей алмайды

Мәжіліс «Банктер және банк қызметі туралы» заң жобасын екінші оқылымда қабылдады. Құжатқа сәйкес, енді азаматтардың бір уақытта бірнеше банктен немесе микроқаржы ұйымынан несие рәсімдеуіне тыйым салынады.

Жаңа нормаларға сай, бір жеке тұлға бір сағат ішінде тек бір қаржы ұйымына ғана несие өтінімін бере алады. Егер азамат сол уақыт аралығында екі немесе одан да көп банкке өтінім жолдаса, бұл ақпарат Антифрод орталығына жіберіліп, алаяқтық белгілеріне тексеріледі.

Сондай-ақ заң жобасы бойынша несие бюролары Антифрод орталығының қатысушылары қатарына енгізіледі. Бұл шара қаржы жүйесіндегі тәуекелдерді азайтып, азаматтардың несие тарихын қорғауға бағытталған.

Сонымен қатар биометриялық растау және электронды цифрлық қолтаңба (ЭЦҚ) шығару процесі енді тек клиенттің жеке қатысуымен ғана жүзеге асырылады.

Мәжіліс депутаттарының пікірінше, бұл бастама азаматтардың қаржылық қауіпсіздігін күшейтіп, жалған несие рәсімдеу және кибералаяқтықтың алдын алуға мүмкіндік береді.