Қазақстандықтар емханадан шыға сала алаяқтарға алданып қалып жатыр

Қазақстан Денсаулық сақтау министрлігі әлеуметтік желілерде тараған емханаға барғаннан кейін алаяқтар қоңырау шалып жатыр деген шағымдарға байланысты мәлімдеме жасады.

Әлеуметтік желі қолданушыларының бірі анасына дәрігерден шыққаннан кейін бірден қоңырау келгенін жазған. Қоңырау шалған адам өзін дәрігер ретінде таныстырып, қабылдауға жазу үшін келген SMS-кодты сұраған.

Министрлік бұл қоңыраулар емханалар жұмысына байланысты емес екенін мәлімдеді. Ведомствоның айтуынша, алаяқтар адамдардың, әсіресе қарттардың сенімін пайдаланып, медициналық мекеме қызметкері ретінде хабарласады.

«Пациенттердің емханаға барғанын нақты уақытта бақылауға мүмкіндік беретін жүйелердің бұзылғаны немесе деректердің заңсыз тарағаны туралы расталған фактілер тіркелген жоқ. Мұндай жағдайлар алаяқтардың кең таралған схемаларына ұқсайды», – деп мәлімдеді министрлік.

Министрлік азаматтарға өз деректерін тек eGov.kz, eGov Mobile немесе Damumed қосымшалары арқылы тексеруге кеңес берді. Сондай-ақ SMS-кодтар тек цифрлық сервистерге кіру кезінде жіберілетінін, ал емхана қызметкерлері телефон арқылы мұндай кодтарды сұрамайтынын ескертті.