Қазақстандықтар балаларының бойына қандай құндылықтарды сіңіргісі келеді?

«Қазақстан отбасылары» ұлттық баяндамасының деректері бойынша қазақстандықтардың көпшілігі балаларының бойына ең алдымен еңбекқорлық, шыншылдық және үлкендерді сыйлауды сіңіргісі келетіні анықталды.

Мәліметтер төрт жас бойынша топтастырылды (18-28 жас, 29-45 жас, 46-60 жас, 61 жас және одан үлкендер). 3 000 респондент қатысқан зерттеу нәтижесі бойынша, еңбекқорлық барлық жас тобында бірінші орын иеленді. Аталған құндылық жас ұлғайған сайын маңыздырақ болып отыр: 18-28 жастағылар арасында 26,8%, 29-45 жаста 38,3%, 46-60 жаста  44,9%, ал 61 жастан асқандар арасында 51% жеткен.

Шыншылдық екінші орында тұр: 18-28 жаста  21,2%, ал 61+ жаста  36,9%.

Үлкендерді құрметтеу де жоғары бағаланады. Бұл көрсеткіш барлық жас санаттарында «барлық адамдарды сыйлау» құндылығымен салыстырғанда айтарлықтай жоғары.  Жастар арасында үлкенді сыйлауды 17,2% маңызды деп санаса, орта және ересек топтарда бұл деңгей шамамен 34%-ға жетеді.

Өзін-өзі сыйлау құндылығы ерекше жағдай ретінде тіркелді: бұл көрсеткіш егде жас тобында (61+) төмендеп, 23,4%-ды құрады. Жастар арасында ол 20,7%-ды құрап, кейін 25%-ға дейін (29-45 жас) өссе, 46–60 жаста ең жоғарғы шегіне 26,6%-ға жеткен.