Қазақстандықтар алған несиесінен 14 күн ішінде айыппұлсыз бас тарта алады

12 қазаннан бастап Қазақстанда азаматтар мүлік кепілімен қамтамасыз етілмеген несиеден шарт жасалған күннен кейін 14 күн ішінде бас тарта алады. Бұл талап Қаржы нарығын реттеу және дамыту агенттігінің жаңа ережелерінде бекітілген.

Жаңа тәртіп бойынша қаржы ұйымы қарыз алушыға шарт жасалған күннен бастап күнтізбелік 14 күн ішінде несиеден бас тартуға мүмкіндік беруге міндетті. Бұл жағдайда банк немесе басқа қаржы ұйымы тұрақсыздық айыбын немесе өзге де айыппұл салмайды.

Алайда қарыз алушы несиені пайдаланған уақыт үшін есептелген сыйақыны төлеуі керек. Мысалы, адам ақшаны алып, бірнеше күннен кейін несиеден бас тартса, сол күндерге есептелген сыйақы алынады.

Ереже кепілсіз несиеге байланысты жасалған ерікті сақтандыру шартына да қолданылады. Азамат 14 күн ішінде сақтандырудан бас тарта алады. Бұл ретте сақтандыру қолданылған уақытқа сәйкес сақтандыру сыйлықақысының бір бөлігі немесе қаржы ұйымының нақты жұмсаған шығыны ұсталып қалуы мүмкін.

Жаңа талаптың мақсаты – қаржы қызметін пайдаланатын азаматтардың құқығын күшейтіп, қарыз алушыға шешімін қайта қарауға мүмкіндік беру.