Қазақстандықтар 2028 жылдан бастап Оңтүстік Кореяда заңды жұмыс істей алады

Қазақстан Оңтүстік Кореяның Жұмысқа орналастыруға рұқсат беру жүйесіне (EPS) қатысушы елдердің қатарына ресми түрде енді. Қазақстандықтарды осы жүйе арқылы Оңтүстік Кореяға жұмысқа жіберу 2028 жылдан басталады деп жоспарланып отыр, деп хабарлады Еңбек және халықты әлеуметтік қорғау министрлігі.

Қазақстан E-9 жүйесіне қатысатын 18-ші мемлекет болады. Қазір EPS бағдарламасына Филиппин, Моңғолия, Шри-Ланка, Вьетнам, Таиланд, Индонезия, Пәкістан, Камбоджа, Қытай, Бангладеш, Шығыс Тимор, Непал, Мьянма, Лаос, Өзбекстан, Қырғызстан және Тәжікстан қатысады.

«Қазақстандық жұмысшыларды Корея Республикасына тарту 2028 жылдан басталады деп күтіліп отыр. Оған дейін үкіметаралық өзара түсіністік туралы меморандум жасасу және Қазақстанда корей тілінен сынақ өткізетін EPS-TOPIK орталығын құруды қоса алғанда, бірқатар ұйымдастыру жұмысын аяқтау қажет», – делінген министрлік хабарламасында.

EPS жүйесіне қосылу қазақстандықтарға екі ел белгілейтін тәртіп бойынша Оңтүстік Кореяда ресми жұмыс істеуге мүмкіндік береді.

Жұмысшыларды іріктеу бейресми делдалдардың қатысуынсыз, ресми жүйе арқылы жүргізіледі. Министрлік рәсім толық іске қосылғанға дейін «Кореяда жұмысқа орналастыруға кепілдік береміз» немесе іріктеуден жылдам өткіземіз деп ақша сұрайтын делдалдарға сенбеуге шақырды.

Үміткерлер корей тілінен сынақ тапсырып, кәсіби дағдылары бойынша бағалаудан және медициналық тексеруден өтуі керек.

Тіркелу мерзімі, үміткерлерге қойылатын талаптар, сынақ өткізу тәртібі және басқа кезеңдер туралы ақпарат кейін ресми арналар арқылы жарияланады.

Қазақстан бірнеше жылдан бері EPS жүйесіне қосылу бойынша жұмыс жүргізіп келеді. 2025 жылғы маусымда Мемлекеттік еңбек инспекциясы комитетінің басшысы Ерболат Әбілхатин 2024 жылы бұл бағытта елеулі жұмыс атқарылғанын, алайда Оңтүстік Кореяда үкімет ауысқаннан кейін үдеріс уақытша тоқтағанын айтқан.

Биыл қаңтарда Оңтүстік Корея делегациясы Қазақстанның EPS жүйесін іске қосуға дайындығын бағалады. Сарапшылар елде жұмысшыларды іріктеу, тілге үйрету, медициналық тексеруден өткізу және олардың заңсыз қалып қоюының алдын алу үшін қажетті инфрақұрылым мен мекемелер бар екенін атап өткен.